TO MARGARET PASTON 1465,  09, 
14  
To my mastras Margaret Paston be thys delyueryd in hast at 
London. 
Aftyr all humbyll and most dwe recomendacion, as lowly as i can i 
beseche yow of youyr blyssyng. Plesyt yow to wet þat i haue sent 
to my fadyr to haue an answer of syche maters as i haue sent to hym for 
in hast, of whyche materys the grettest of substans is for the maner of 
Cotton; besechyng yow to remembyr hym of the same mater, þat i 
may haue an answer in þe most hasty wyse. Also i pray yow that 
myn ante Poonyngys may be desyiryd to send me an answer of syche 
materys as sche wotyth of by hym þat schall brynge me an answer 
of þe mater of Cotton. Also, modyr, i beseche yow þat ther 
may be purueyd some meane þat i myth haue sent me home by 
þe same mesenger ij peyir hose, j peyir blak and an othyr peyir of 
roset, whyche be redy made for me at the hosers wyth þe crokyd 
bak next to þe Blak Freyrs gate wyth-in Ludgate; John Pampyng 
knowyth hym well j-now. i suppose and þe blak hose be payid 
for, he wyll send me þe roset vnpayd for. I beseche yow 
þat þis ger be not forget, for i haue not an hole hose for to 
do on. I trowe they schall cost bothe peyr viij s.  
My brodyr and my sustyr Anne and all þe garyson of Heylysdon 
fare well, blyssyd be God, and recomand hem to yow euerychon. i pray 
yow vysyt þe Rood of Northedor, and Seynt Sauyour at 
Barmonsey amonge whyll ye abyd in London, and let my sustyr Margery 
goo wyth yow to prey to them þat sche may haue a good hosbond 
or sche com hom ayen. And now i pray yow send vs some tydyngys as 
ye wer wonte to comand me. And the Holy Trinyté haue yow in 
kepyng, and my fayir mastras of þe Fleet. Wretyn at Norwhche 
on Holy Rood Daye. Youyr sone and lowly seruaunt J. Paston þe 
yongest