TO JOHN PASTON 1462,  11, 
01  
To my ryth reuerent and worchepfull fadyr John Paston be thys 
delyueryd in hast. 
Ryth reuerent and worchepfull fadyr, i recomand me on-to yow, 
besechyng yow lowly of yowyr blyssyng. Plesyt yow to haue knowlage 
þat my lord is purposyd to send for my lady, and is lyke to kepe 
hys Crystmas her in Walys, for þe Kyng hathe desyiryd hym to do 
þe same. Wherfor i beseche yow þat [ye] wole wychesaue 
to send me some mony by the berer herof, for in good feythe, as it is 
not onknowyng to yow, þat i had but ij noblys in my purse 
whyche þat Rychard Call took me by yowyr comandement when i 
departyd frome yow owt of Norwyche. The berer her-of schuld bye me a 
gowne wyth pert of the mony, if it plese yow to delyuer hym as myche 
mony as he may bye it wyth; for i haue bot on gowne at Framyngham 
and an other her, and þat is my leueré gowne and we must 
wer hem euery day for þe most part, and on gowne wyth-owt 
change wyll sone be done. As for tydyngys, my lord of Warwyk yed 
forward in-to Scotlond as on Saterday last past wyth xx ml men, and Syr 
Wylliam Tunstale is tak wyth þe garyson of Bamborowhg, and is 
lyke to be hedyd, by þe menys of Syr Rychard Tunstale is owne 
brodyr.  
As sone as i her ony more tydyngys i schall send hem yow, by þe 
grace of God who haue yow in hys kepyng. Wretyn in hast at the 
casty[l] of þe Holt vp-on Halowmas Daye. Yowyr sone and lowly 
seruaunt J. Paston, junior