TO MARGARET PASTON 1474,  02, 
20  

Ryght honorable and most tendre good moodre, I recomand me to 
yowe, besechyng yow to haue, as my tryst is þat I have, yowre  
dayly blessyng; and thanke yow off yowre good moderhood, kyndenesse, 
cheere, charge, and coste whyche I had and pvtte yow to att my last 
beyng wyth yow, wh[y]che God gyffe me grace her-afftre to deserve. 
Please it yow to weet þat I thynke longe þat I heere nott 
from yow, ore from Pekok yowre seruaunt, fore the knowlege howe he 
hathe doon in þe sale off my ferme barlye, nere what is made 
there-off. Wherffore I beseche yow, iff it be not answeryd by that tyme 
þat thys bylle comythe to yowe, to hast hym and 

itt hyddrewardys, fore iff þat had nott taryed me I deme I had ben 
at Caleys by thys daye. For it is soo, as men seye, þat þe 
Frense Kynge wyth a gret hoste is at Amyas, but iijxx myle from 
Caleys, and iff he ore hys roode byffore Caleys and I nott theere, I 
wolde be sorye. Item, men seye þat the Erle off Oxenfford 
hathe ben constreynyd to sewe fore hys pardon only off hys lyffe, and 
hys body, goodes, londes, wyth all þe remenaunt at þe 
Kynges wyll, and soo sholde in all haste nowe com in to þe Kyng. 
And som men seye þat he is goon owt off þe Mownte, men 
wot not to what plase, and yit leffte a greet garnyson theere weell 
fornysshyd in vytayll and all other thyng. Item, as fore the hauyng 
ageyn off Castre, I trust to have good tydyngys theroff hastelye. 
Item, my brother John farethe  weell, and hathe doon ryght 
delygentlye in my cosyn Elisabeth Berneys materys, wheroff hastely I 
trust he shall sende hyre tydyngys þat schall please hyre; and as 
to-morow he purposyth to take hys jurneye to Walys warde to þe 
Lord Ryverse. Nomore at thys tyme, but Jeswe haue yow in hys kepyng. 
Wretyn at London the xx daye off Feuerere Ao E. iiijti xiijo. Yowre 
sone J. Paston, K.