TO JOHN PASTON III 1473,  11, 
25  
To John Paston, esquiere. 
Ryght wyrshypffull and well belovyd brother, I recomaund me to 
yow, letyng yow weet þat I sende yow herwyth j sitacion where-in 
ben my moodre and yee, wheroff I praye yow þat I maye haue 
hasty answeere. The effeccte theroff is no moore bute ye bothe most 
sende answere and make yow a proctore heere, and that most come 
hyddre ondre a notaryes syngne affermyng that ye make suche a man 
Master John Halsnothe, ore ellis yff ye will do þe cost to sende 
som other hyddre yowre proctore to take admynystracion ore to reffuse, 
and what so he dothe ye to holde it for ferme and stable. Than most my 
moodre and ye wryght a letter vndre my moodrys seall and yowre 
syngne manuell to me and Master John Halsnothe jn thys forme: we gret 
yow well, letyng yow weet þat we haue made yow, Master John 
Halsnoth, owre proctore in the testament off John Paston, husbond and 
fadre to yow, wherin we wyll þat an owre behalff ye reffuse the 
admynestracion off the seyde testament; and thys wryghtyng is to yow 
warant and dyscharge, and also the verry wyll off vsse.' Thys most we 
haue for owre dyscharge. Item, I pray yow take good hedde to my 
soster Anne lesse the olde love atwyen hyre and Pampyng renewe. 
Item I pray yow sende me worde howe my moodre is dysposyd to 
hyr wardys, and iffe so weer that a good mariage myght be had, what 
she wolde depart wyth. Item, I praye yow þat ye remembre 
hyr for the tombe off my fadre at Bromholme, and also the chapell at 
Mavteby, and sende me worde how she is dysposyd her-in. Item, 
iff I have Caster ageyn whethyre she wolle dwelle ther or nott, and I 
wyll fynde hyr a prest towardys at my charge and geve hyr the  
 
dovehowse and other comodytés ther; and iff any horsekeper off 
myn lye ther I wolle paye for hys borde also, as weell as for the prestys. 
Item, iff my  moodre sholde haue a new prest I thynk þat 
my brother Syr J. Goos weere a metly man to be ther. He wolde also 
doo as ye wolde haue hym. Nowe bere the cuppe euyn, as 
whatcalle-ye-hym seyde to Aslake. Be ware off mynerys fro hense 
forthe, and sende me worde how ye trist Doctore Pykenham. I wolde, iff 
he wolde doo owght for my moodre, that he hastyd the sonner to paye 
me the c li. so þat I myght pledge owt Sporle. Item, as fore 
other tydyngys, the Erle off Oxenforthe is stille besegyd. Neuerthelesse 
onys he issued owt and toke a jentilman and hant hym wyth-in, but now 
off late he was besye and on espyed hym and shott at hym and strake in 
the  verry  fase wyth an arowe. I sye thys daye þe same man, and 
theer I leeff hym. Iff Arblaster come to yow ye maye  see hys letter 
sente to hym by me, wherin I have wretyn þat he scholde take 
yowre advyce; but I pray yow above all thyngys that ye make hast so 
þat I heer from yow ageyn by thys day vij nyght. At London the 
xxv daye off novembre. John Paston, K.