TO EDMOND PASTON II 1473,  07, 
05  
A Edmond Paston, esquyere, a Caleys soyt donné  
 

Brothere Edmond, I grete yow weell, letyng yow weete þat 
abowt thys daye vij nyght I sende yow a letter by Nycholas Bardeslee, a 
sowdyore whyche is wont to be at borde [at] Perauntys, and also an 
hoseclothe off blak fore yow. I wende þat ye sholde haue hadde itt 
wyth-in ij dayes, but I am afferde þat he deseyued me. 
Item, I lete yow weet þat Plattyng is comen hyddre, and he 
seythe þat ye gaffe hym leve to fetche hys geere and Pittys, and 
that is hys erande hyddre and noon othere; nere he thowt neuer to goo 
fro me, nere he wyll nott goo fro me, as he seythe. Wherffor I praye 
yow sende me worde off hys condycions, and whyghe ye thynke 
þat he sholde neuer do me worshypp. He seythe also þat he 
and Pytte weer at þe takyng off the Esterlyngys, and that he was 
in the Pakkere and Pytte in the Crystoffre. I praye yow sende me worde 
howe bothe he and Pitte quytte them, by the report off som jndyfferent 
trewe man þat was there. Iff they quytte them weell I wolde love 
them the better, wherffore the next daye afftre the syte off thys letter I 
praye yow wryght ageyn, and sende it by the next passage. Item, I 
sende a lytell praty boxe herwith whyche I wolde þat Juddy sholde 
delyuer to þe woman þat he wotyth off, and praye hyre to 
take it to þe man þat she wotyth off; þat is to seye as 
moche as ye know all well j-now, bot ye maye nott make yow wyse in 
no wyse. Item, I praye yow sende me worde as ye were wont to 
do off heere well- ffare, and whether I weere owt and other jnne, ore 
nott; and whether she shall forsake Caleys as sone as ye sende me worde 
off, or nott. By God,i wolde be wyth yow as fayne as yowre-selff, and 
shall be in hast, wyth Goddys grace. Item, as for my brother 
John, I hope wyth-in thys monyth to see hym in Caleys, for by lyklyhod 
to-morowe or ellys the nexte daye he takyth shyppe at Yarmothe and 
goothe to Seynt James warde, and he hathe wretyn to me þat he 
wyll come homwarde by Caleys. Item, I suppose þat James 
Songer shall com wyth me to Caleys þe rather for yowre sake. 
Item, Mestresse Elysabett fareth well. but as yit Songer knoweth 
nott so parffytly all þat ye wolde weet þat he woll nott 
wryght to yow off thees ij dayes tyll he knowe moore. But iff she hadde 
ben bolde, and durst have abydyn styll at hyre gate and spoken wyth me, 
so God helpe me she had hadd thys same þat I sende nowe where 
ye woot off, whyche ye shall see woryn heer afftre. Itt is a praty ryban 
wyth praty aglettys and goodlye. Make yow nott wyse to Juddy, nowther 
not þat ye wolde weet any thynge, fore I maye sey to yowe at hys 
comyng ovre he browt goodly geere resonablye.  
Item, as for my byll þat is gylt, I wolde it weer taken heed 
too. There is on in the town þat can glaser weell j-nowe, as I 
herde sey. Also ther is on comythe euery markett daye fro Seynt Omerys 
to Caleys, and he bryngethe dagerys and fecchyth; also he maye haue it 
wyth hym and brynge it ageyn the next markett daye for xij d. or xvj at 
þe most; and ellys late it be weel oylyd and kepte tyll I come. No 
more. Wretyn at London þe v daye off jull ao E. iiijti xiijo.