TO JOHN PASTON III 1473,  02, 
03  
To John Paston, esqwyere, ore to Mestresse Margret Paston hys 
moodre, be thys letter delyueryd. 
Weell belovyd brother, I comand me to yow, letyng yow weet 
þat I wrote yow a letter þe xxij daye off Januare whyche 
was delyueryd to Thomas Elys at Caleys the seyde daye, wenyng to me 
þat he sholde haue ben in Norffolk wyth-in vj or vij dayes afftre, 
but now I vndrestand that thys letter is lyke to be wyth yow as sone as 
it. It is so now þat I suppose verrely to be at London by the xiij 
or xiiij daye off Feverere but iff wynde ore wedre cawse it; at whyche 
daye, acordyng as the other letter spekyth off, I beseche my moodre 
þat Playtere maye mete wyth me there, lyke as he and I comonyd 
towchyng the maner off Sporle, and I trust to God that that mater shall 
be easyd. Item, I praye yow take goode heed to þe letter 
þat yonge Thomas Elys hathe the beryng off, to weete whether it 
hathe been oponyd ore nott; þe worde is full false. As for 
tydyngys heer, ther bee but fewe saff þat þe Duke off 
Borgoyn and my lady hys wyffe farethe well; I was wyth them on 
Thorysdaye last past at Gawnt. Peter Metteney farethe weell and 
Mestresse Gretkyn bothe, and Babekyn recomand hyre to yow. She hathe 
ben verry seke, but it hathe doon hyre goode for she is fayrer and 
slenderer than she was. And she cowde make me no cheere, but alwey 
my sawse was 'how faret Master John yowre brother?', wher-wyth I was 
wrothe and spake a jalous worde are too, dysdeynyng þat she 
shulde care so moche for yow when þat I was present.  
 
I pray yow make a goode bargeyn for my ferme barly in Fledge, so that 
I myght haue mony now at my beyng in Ingelond, whyche shall not 
contynew past a monyth by lyklyhod. Item, I pray yow take goode 
heede to myn olde stuffe at Norwyche soo that it appeyre nott, and sende 
me worde to Hoxonys in wrygtyng what goode þe bysshop ded 
fore me att Framynham and how my lorde, my lady, and all the cort are 
dysposyd to me wardys. I herd also seye þat my ladye and 
yowrys, Dame Margret Veere, is ded, God haue hyre sowle. Iff I weer 
not sorye for herre I trowe ye haue been. No moore to yow at thys 
tyme, but All-myghty Good haue yow in kepyng. Wretyn at Caleys 
þe iij daye off Februarye ao r.r. E. iiij xijo. .J P., K.