TO JOHN PASTON I 1464,  03, 
05  
To my ryght wyrschypful fadre John Paston, esquyere, be thys 
letter delyueryd in hasty wyse. 
 Ryght worschypful syre, jn the most lowly wyse I comaund me to 
yowre good faderhod, besechyng yow of yowre blyssyng. Mut it plese 
yowre faderhod to remembre and concydre the peyn and heuynesse 
þat it hathe ben to me syn yowre departyng owt of thys 
contré, here abydyng tyl the tyme it please yow to schewe me 
grace, and tyl the tyme that by reporte my demenyng be to yowre 
plesyng; besechyng yow to concydre þat I may not nere haue noo 
mene to seke to yow as I awght to do sauyng vndre thys forme, whych I 
besech yow be not take to no dysplesure, ner am not of power to do any 
thynge in thys contré for worschyp or profyht of yow nere ease 
of yowre tenauntys whych myght and scholde be to yowre pleasyng. 
Wherfor I beseche yow of yowre faderly pyté to tendre þe 
more thys symple wryghtyng, as I schal owt of dowght her-afftere doo 
þat schal please yow to þe vttermest of my powere and 
labore. And if there be any servyce þat I may do, it it please yow 
to comaund me or if I maye vnderstonde it, I wyl be as glad to do it as 
any thyng erthely, if it were any thyng þat myght be to yowre 
pleasyng. And nomore, but Allmyghty God haue yow in kepyng. Wretyn 
the v day of Marche. By yowre oldere sone John Paston