TO JOHN PASTON II 1469, 09, 10 I grete &yogh;ow wel and send &yogh;ow Goddys blyssyng and myn, letyng &yogh;ow wete þat on Thurysday last was my moder and I where wyth my lord of Norwych, and desyerd hym þat he woold nomore do in þe matere towscheyng &yogh;owr syster tyl þat &yogh;e and my brothere, and othere þat wern executors to &yogh;owr fader, mythe beyn here to-geder, fore they had þe rule of here as weel as I. And he sayde playnly þat he had be requeryd so oftyn fore to exameyn here þat he mythe not, nore woold, no lengare delayyt, and schargyd me in peyn of cursyng þat sche schuld not be deferred but þat sche xuld a-pere be-forn hym þe nexte day. And I sayd pleynly þat I woold nowder bryng here nore send here; and þan he sayd þat he woold send fore here hym-sylfe, and schargyd þat sche schuld be at here lyberté to cume wan he sent fore here. And he seyd be hys trowthe þat he woold be as sory fore here and sche ded not welle as he wold be and sche were ryth nere of hys kyn, bothe fore my moderys sake and myn and othere of here frenddys; fore he woost welle þat here demenyng had stekyd soore at owr hartys. My moder and I in-formyd hym þat we kowd neuer onderstond be here sayyng, be no language þat euer sche had to hym, þat neythere of hem were bownd to othere, but þat they myth schese bothe. þan he seyd þat he woold sey to here as wele as he kowde be-fore þat he exameynd here; and so yt was told me be dyuerse persones þat he ded as welle and as pleynly as sche had be rythe nere to hym, wych were to long to wrythe at thys tyme. Hereafty[r] &yogh;e xalle wete, and hoo were laberers there-in. þe schanselere was not so gylty there-in as I weend he had ben. On Fryday the Bysschope sent fore here be Asschefeld and othere þat arn ryth sory of here demenyng. And þe Bysschop seyd to here ryth pleynly, and put here in rememberawns how sche was born, wat kyn and frenddys þat sche had, and xuld haue mo yf sche were rulyd and gydyd aftyre them; and yf sche ded not, wat rebuke and schame and los yt xuld be to here yf sche were not gydyd be them, and cause of foresaky[n]g of here fore any good ore helpe ore kownfort þat sche xuld haue of hem; and seyd þat he had hard sey þat sche loued schecheon þat here frend were not plesyd wyth þat sche xuld haue, and there-fore he bad here be ryth wel a-vysyd how sche ded, and seyd þat he woold wndyrstond þe worddys þat sche had seyd to hym, wheythere yt mad matramony ore not. And sche rehersyd wat sche had seyd, and seyd yf thoo worddys mad yt not suhere, sche seyd boldly þat sche wold make yt suerhere ore þat sche went thens; fore sche sayd sche thowthe in here conschens sche was bownd, wat so euere þe worddys wern. Thes leud worddys gereue me and here grandam as myche as alle þe remnawnte. And þan þe Bysschop and the schawnselere bothe seyd þat there was neythere I nere no frend of hers wold reseyuere. And þan Calle was exameynd aparte be hym-sylfe, þat here worddys and hys acordyd, and the tyme and where yt xuld a be don. And þan þe Bysschop sayd þat he supposyd þat there xuld be fownd othere thynggys ageyns hym þat mythe cause þe lettyng there-of, and there-fore he say[d] he wold not be to has[[ty]] to geue sentens there-vp-on, and sayd þat he wold geue ouere day tyl þe Wodynsday ore Thursday aftyre Mykylmes, and so yt tys delayyd. They woold an had here wyl parformyd in haste, but þe Bysschop seyd he woold non othere-wyse þan he had sayd. I was wyth my moder at here plase wan sche was exameynd, and wan I hard sey wat here demeny[n]g was I schargyd my seruantys þat sche xuld not be reseyued in myn hows. I had &yogh;euen here warny[n]g, sche mythe a be ware afore yf sche had a be grasyows. And I sent to on ore ij more þat they xuld not reseyue here yf sche cam. Sche was browthe a-geyn to my place fore to a be reseyued, and Ser Jamys tolde them þat browthe here þat I had schargyd hem alle, and sche xuld not be reseyued; and soo my lord of Norwych hath set here at Rogere Bestys to be there tyle þe day before say[d], God knowyth fule euel ageyn hys wyle and hys wyvys, yf they durst do othere-wyse. I am sory þat they arn a-cumyrd wyth here, but &yogh;et I am better payed þat sche is there fore þe whyle þan sche had ben in othere place, be-cause of þe sadnes and god dysposysion of hym-sylfe and hys wyfe, fore sche xal not be souerd there to pleye þe brethele. I pray &yogh;ow and requere &yogh;ow þat &yogh;e take yt not pensyly, fore I wot wele yt gothe ryth nere &yogh;owr hart, and so doth yt to myn and to othere; but remembyre &yogh;ow, and so do I, þat we haue lost of here but a brethele, and setyt þe les to hart; fore and sche had be good, wat so euere sche had be yt xuld not a ben os jt tys, fore and he were ded at thys owyre sche xuld neuere be at myn hart as sche was. As fore þe devors þat &yogh;e wrete to me of, I suppose wat &yogh;e ment, but I scharge &yogh;ow vpon my blyssyng þat &yogh;e do not, nere cause non othere to do, þat xuld offend God and &yogh;owr conschens; fore and &yogh;e do, ore cause fore to be do, God wul take vengawns there-vpon and &yogh;e xuld put &yogh;owr-sylfe and othere in gret joparté. Fore wottyt wele, sche xal ful sore repent here leudnes here-aftyre, and I pray God sche mute soo. I pray &yogh;ow, fore myn hard ys hese, be &yogh;e of a good cownfort in alle thynggys. I trust God xal helpe ryth wele, and I pray God so do in alle owr maters. I wuld &yogh;e toke hed yf there were any labore mad in þe kort of Cawntyrbery fore the leud matere fore sayd. But yf the Duke be purveyd fore, he and hys wyse kow[n]sel xalle lese thys cuntré. Yt tys told me þat he sethe þat he wul not spare to do þat he is purposyd fore no duke in Ynglond. God helpe at nede.