TO JOHN PASTON II 1469,  08, 
31  
To Ser John Paston be this deliuered in ha[[st]]. 
I grete you wele and send you Goddes blyssyng and myn, letyng 
you wete that Ser John Heuenyngham was at Norwich this day and spake 
wyth me at my moderes; but he wuld not þat it shuld be 
vnderstand, for my lord hath mad hym on of the capteynes at Cayster of 
þe pepill þat shuld kepe the wetche abought the place 
þat no man shuld socour them if my lord departed. I desired hym 
to favour them if any man shuld come to them fro me or you, and he 
wuld not graunte it; but he desired me to write to you to vnderstand if 
that my lord myght be mevyd to fynde suerté to recompense you 
all wronges and ye wuld suffre hym to entre pesibilly and the lawe after 
his entré wuld deme it you. Be ye avysed what answere ye wull 
geve. Item, sith that þat I spake wyth hym and the same 
day a feythfull frende of owres came on-to me and mevyd me if 
þat my lord myght be entreted to suffre endifferent men to kepe 
the place and take the profites for bothe parties till þe right be 
determyned be the lawe, and my lord for his parte and ye for your parte 
to fynde sufficient suerté þat your nowthere shuld vex, 
lette, ner trobilled the seid endifferent men to kepe pesibilly the 
possession of þe seid place, and to take þe profightes on-to 
the tyme it be determyned be þe lawe to his behowe þat the 
lawe demeth it. And þo seid persones þat so endifferently 
kepe possession before there entré in-to the seid place to fynde 
also sufficient suerté to answere the parté þat the 
lawe demeth it to of þe profites, duryng there possession, and to 
suffre hym pesibilly to entre, or any in his name, whan so euer thei be 
required be the parté to whom the right is demyd. Of all 
þes premysses send word how ye wull be demened be as good 
advyse as ye can gete, and make no lengere delay; for thei must nedes 
haue hasty socour that be in the place, for thei be sore hurt and haue non 
help. And if thei haue hasty help it shall be the grettest wurchep 
þat euer ye had, and if þei be not holpen it shall be to you 
a gret diswurchep, and loke neuer to haue favour of your neybores and 
frendes  
but if this spede wele. þer-fore prend it in your mend and purvey 
þer-fore in hast, how so euer ye do. God kepe you and send you 
the vittory of your elmyse, and geve you and vs all grace to leve in peas. 
Wretyn on Sent Gyles Evyn at ix of þe belle at nyght. Robyn 
came home yester evyn, and he brought me nowthere writyng from you 
ner good answere of this mater, which grevyth me right ill þat I 
haue sent you so many massangeres and haue so febill answeres ageyn. 
Be your modere