TO JOHN PASTON I 1465,  04, 
08  
To my ryght worchepfull hosbond Jon Paston be þis 
deliueryd in hast. 
Right worchepfull hosbond, I recommand me to you. Please you to 
wet that I send you a copy of a deed that Jon Edmondys of Taueram sent 
to me be þe menys of Dorlet. He told Dorlet that he had suche a 
deed as he supposyd that wold don ease in prevyng of þe tytyll 
that the Duk of Suffolk cleymythe in Drayton, for þe same deed 
that he sent me þe seale of armys is lyke on-to þe copy 
þat I send you, and noo thyng leke to the Duk of Suffolk 
auncesters. Item, þe seyd Edmond seythe yf he may fynd any 
other thyng that may do yow ease in þat mater he wolle doo hys 
part therin. Item, Jon Russe sent me word that Barker and Herry Porter 
told hym in councell that þe Duk of Suffolk hathe bowght on 
Brytyeff ryght, þe wyche makythe a cleyme on-to Heylysdon, and 
þe seyd Duke is purposyd to entere wythin shorte tyme after 
Esterne; for in so moche þe seyd Russe felte be þe seyd 
Barker and Porter that all þe feffees wolle make a relees on-to 
þe Duk and helpe hym þat they can in-to her power, for to 
have hys good lorchep. Item, yf it please you, me thynkythe it 
ware ryght nessessary þat ye send word howe þat ye wolle 
your old malte be purveyd fore, for and any hote weder come affter 
þat it hathe leyne þis wynter season it shall be but lost but 
yf it be sold be tymys. For as fore þe pryse here, it is sore falle. I 
have sold a c comb of malt þat came fro Guton to Jamys 
Golbeter, clenefyed and strek met and non jument [?], for ij s. ij d. 
þe comb, and to be payeed at Mydsomer and Lammes. 
Item, ther be dyuers of your tenauntrys at Mauteby that had gret 
ned for to be reparyd, but þe tenauntys be so pore that they are 
not a power to repare hem; whefor yf [it] leke you I wold that þe 
marche þat Bryge had myght be kept in your owne hand þis 
yer, that þe tenauntys myght have ruschys to repare wyth her 
howsys. And also ther is wyndfall wod at þe maner þat is 
of noo gret valewe, þat myght helpe hem wyth to-ward þe 
 
reparacion yf it leke you to late hem have it þat hathe most need 
therof. I have spoke wyth Borges that he shuld heyne þe price of 
þe mershe or ellis I told hym þat he shuld no lenger have it 
for ye myght [have] other fermors therto that wold geve ther-fore as it 
was late be-fore; and yf he wold geve therfore as moche as a-nother man 
wold, ye wold þat he shuld have it be-for any other man. And he 
seyd he shuld geve me answere be a fortenyght after Esterne. I can get 
non other fermor ther-to yet. Item, I vnderstand be Jon Pampyng 
that ye wolle not þat your sone be take in-to your hows nor holp 
be you tylle suche tyme of yere as he was put owt therof, the wiche 
shalle be a-bowght Seynt Thomas messe. For Godys sake, ser, a pety on 
hym and remembre yow it hathe be a long season syn he had owt of you 
to helpe hym wyth, and he hathe obeyed hym to yow and wolle do at all 
tymis, and wolle do that he can or may to have your good faderhood. 
And at þe reuerence of God, be ye hys good fader and have a 
faderly hert to hym. And I hope he shall euer knowe hym-selff þe 
better her-after and be þe more ware to exchewe suche thyngys as 
shuld dysplease you, and for to take hed at þat shuld please you. 
Pecoke shalle telle you be mothe of more thyngys than I may write to 
you at þis tyme.  The blysyd Trinité have yow in hys 
kepyng. Wretyn at Caster in has[t]e þe Monday next after Palme 
Sonday. Your M. P.