TO JOHN PASTON I 1464,  05, 
06  
Tho my ryt worschopffull hossebond John Paston, in hast. 
Rythe wourchepfwl hosbond, I recommawnd me onto &yogh;ow. 
Plesyth &yogh;ow to wete þat on Thoris-day last was þer 
were browt on-to þis towne many prevy selis; and on of hem was 
indosyd to &yogh;ow and to Hastynggys and to fyve ore sexe odyre 
gentylmen, and a-nodyr was sent on-to &yogh;owre sone and in-dosid to 
hym-selfe alone, and asynyd wyth-inne wyth þe Kynggys howyn 
hand, and so were bwt fewe þat were sent, as it was told me, and 
also þer were more specyal termys in hys þan wern in 
oderys. I sey a copy of þoo þat were sent onto odyr 
gentylmen. þe intent of þe wrytyng was þat 
þey schwlde be wyth þe Kyngg at Leycestre þe x day 
of May, wyth as many personys defensabylly arayid as þey myte, 
acordyng to her degré, and þat þey schwld bryng 
wyth hem fore here expensys fore ij monythis. As for þe lettyr 
þat was indosyd to &yogh;ow and to odyr, it was delyveryd to 
Welyam &yogh;Elvyrton, for þere aperyd no more of þe 
remwlawnt. Hastyngys js forthe in-to &yogh;Orke-schyre. I prey 
&yogh;ow þat &yogh;e vowchesaf to send word in hast how 
&yogh;e wyl þat &yogh;ore sone be demenyd her-in. Men thynk 
here þat byn &yogh;owre wel-wyllerys þat &yogh;e may 
no lesse do þan to send hym forthe. As fore hys demenyng swn 
&yogh;e departyd, in god feythe it hath byn ryth good and lowly, and 
delygent in ovyrsythe of &yogh;owre servawntys and odyr th[i]nggys 
þe weche I hope &yogh;e wold a be plesyd wyth and &yogh;e had 
be at hom. I hope he wyl  
be wel de-menyd to plese &yogh;ow hereaftyrward. He desyryd 
Alblastere to be mene to &yogh;ow fore hym, and was ryte hevy of hys 
demenyng to &yogh;ow. I sent &yogh;ow word also be Alblastere how I 
dede to hym aftyr þat &yogh;e were go, and I be-seche &yogh;ow 
hartyly þat &yogh;e wochesaf to be hys god fadyr, fore I hope he 
is schastysyd and wil be þe warhere her-aftyr. As for alle odyr 
t[h]ynggys at hom, I hope þat I and odyre schal do howre part 
þer-inne as wel as we may; bwt as for mony, it comyth bw[t] 
slawly in. God have &yogh;ow in hys kepyng and sen &yogh;ow good 
sped in alle &yogh;owre materis. Wretyn in hast at Norwece on 
þe Sonday next be-fore þe Assencyon Day. Sere, I wold be 
ryte glad to he[re] swmme gode tydynggys fro &yogh;ow. Be 
&yogh;orys, M. P.