TO JOHN PASTON I 1463, 04, before 
10  
Please you to wet þat Will Jeney and Debham came to 
Calcote on Wednysday be-fore non, and ther they spake wyth Rysyng 
and John Smythe, and haskyd hem rent and ferme; and they seydyn they 
had payed you and so  
they myght not paye hem also. Ferthermore they told hem that ye had 
hold a corte ther syn þat they enteryd there. Than Jenney answerd 
ageyn, 'Be-cause he held a corte here we mad hym hold corte at 
London, and so shall we make the to hold a corte at Ipysweche wyth-owt 
thowe wolt pay vs þe rent and ferme.' 'Ser', quod Rysyng, 'I toke 
þe ferme of my master and of Ser Thomas Howys.' Jenney seyd. 
'And as for Ser Thomas, he and we shall acord well j-nowe'. And so 
they hathe seled vp þe berne dorys, and woll dryve a-wey 
þe catell, bothe of þe fermorys and of þe tenauntys, 
wyth-owt þe fermor and John Smythe woll fynd hem 
suerté to pay hem at Esterne. And Jenney and Debham woll [be] 
bownd ageyn to hem in a obligacion of xl li. to save hem harm-lese 
ageyns you. And so as yet Rysyng standythe vnder award at Leystofte, 
so Rysyng hathe sent word to me þat I shall knowe thys nyght or 
ellis to morowe what end they hathe mad. Item, as towchyng 
þe burges of Yermothe, they were chosyn on Wednysday. The 
baly Wydwell ys on, and as for the todyr þe Bischop sent to 
þe towne for to have a man of hys owne. And so they be not 
a-cordyd yit of hym; en cas they may not a-cord John Rus shall be the 
todyr. Item, as towchyng Grene, a came not to Caster on 
Thursday, for he went to Norwich þe same day, and so he is yet 
ther. Daubeney hathe spokyn wyth Watkyn Shypdam for to be at Beyton 
on Monday to kepe a corte ther, and so he woll be at Caster on Sonday 
and spek wyth you, for he seythe þat Fastolf hathe mad a cleyme 
ther-to. That is þe cause he wolle comon and spek wyth you 
therof hym-selff. Item, I can not, ner Daubeney nowther, fynd 
your wyght boke; it is not in þe trussyng cofyr ner in þe 
sprucheste nothyr. Jon Walsham toke me a quayere--I suppose it 
lo[n]gythe to þe same boke; þat same I send you and 
þe byllis of Walcote wyth ale sealyd. Wretyn þis day. By 
your M. P.