To my moodre. 
Moodre, I recomande me to yow, letyng yow wette þat, 
blyssed be God, my brother John is a lyffe and farethe well, and in no 
perell off dethe. Neuer the lesse he is hurte wyth an arow on hys ryght 
arme be-nethe þe elbow, and I haue sent hym a sorion whyche 
hathe dressid hym, and he tellythe me þat he trustythe þat 
he schall be all holl wyth-in ryght schort tyme. It is so þat John 
Mylsent is ded, God haue mercy on hys sowle, and  
Wylliam Mylsent is on lyffe and hys othere seruantys all be askapyd by 
all lyklihod. Item, as for me, I ame in good case, blyssyd be God, 
and in no joparté off my lyff if me lyst my-selffe, fore I am at 
my lyberté iff nede bee. Item, my lorde Arche-bysshop is 
in the Towre. Neuer the lesse I trust to God þat he schall do well 
j-noghe. He hathe a saffe-garde for hym and me bothe. Neuerthelesse we 
haue ben troblyd syns, but nowe I vndrestande þat he hathe a 
pardon, and so we hope well. There was kyllyd vppon the felde halffe a 
myle from Bernett, on Esterne Daye, the Erle off Warwykk, þe 
Marqweys Montacu, Syr William Terell, Syr Lowes John, and dyuerse 
other esquierys off owre contré, Godmerston and Bothe. And on 
the Kyng Edwardes partye, the Lorde Cromwell, þe Lorde Saye, 
Syr Omffrey Bowghshere off owre contré, whyche is a sore 
moonyd man here, and other peple off bothe partyes to þe nombre 
off more then a ml. As for othere tythynges is vndrestande here 
þat the Qwyen Margrett is verrely londyd, and hyre sone, in the 
west contré, and I trow þat as to-morow ere ellys 
þe next daye the Kyng Edwarde wyll depart from hense to hyre 
warde to dryve her owt ageyn. Item, I beseche yow þat I 
maye be recomandyd to my cosyn Lomnore, and to thanke hym fore hys 
goode wyll to me wardes iff I had hadde nede, as I vndrestoode by the 
berer heroff. And I beseche yow on my behalue to advyse hym to be 
well ware off hys delyng ore langage as yit, for the worlde, I ensure 
yow, is ryght qwesye, as ye schall knowe wyth-in thys monythe. The 
peple heere feerythe it soore. God hathe schewyd hym-selffe 
marvelouslye, lyke hym þat made all and can vndoo ageyn whan 
hym lyst; and I kan thynke þat by all lyklyod schall schewe 
hym-sylff as mervylous ageyn, and þat in schort tyme, and as I 
suppose offtere then onys in casis lyke. Item, it is soo that my 
brothere in on-purveyed off monye. I haue holpyn hym to my power and 
above, wherffore, as it pleasythe yow, remembre hym, for [i] kan not 
purueye for my-selffe in þe same case. Wretyn at London the 
Thorysdaye in Esterne Weke. I hope hastely to see yow. All thys bylle 
most be secrett. Be ye nat adoghted off the worlde, for I trust all schall 
be well. Iff it thusse contenewe I ame not all vndon, nere noon off vs; 
and iff otherwyse, then, &c.